🔴 नडगीवे नं. २ शाळेत खारेपाटण-शेर्पे संयुक्त शिक्षण परिषद उत्साहात संपन्न
नडगीवे: शुक्रवार दिनांक १९ डिसेंबर २०२५ रोजी नडगीवे नं. २ शाळेमध्ये खारेपाटण आणि शेर्पे केंद्राची संयुक्त शिक्षण परिषद मोठ्या उत्साहात पार पडली. कार्यक्रमाची सुरुवात केंद्रप्रमुख गोपाळ यादव, केंद्र मुख्याध्यापक प्रदीप श्रावणकर, दशरथ शिंगारे आणि उच्च श्रेणी मुख्याध्यापक श्रीपाद बागडी यांच्या शुभहस्ते दीप प्रज्वलन करून करण्यात आली. यावेळी नडगीवे नं. २ च्या मुख्याध्यापिका पूजा शंकरदास आणि उपशिक्षिका रेश्मा होनगुंटे यांनी उपस्थित सर्व मान्यवरांचे व शिक्षक वृंदाचे स्वागत केले. या संयुक्त शिक्षण परिषदेला दोन्ही केंद्रातील ४० पेक्षा जास्त शिक्षक उपस्थित होते.
परिषदेच्या सुरुवातीला केंद्रप्रमुख गोपाळ जाधव यांनी प्रास्ताविक सादर करून प्रशासकीय कामकाजाबाबत सविस्तर मार्गदर्शन केले. त्यानंतर विविध विषयांवर तज्ज्ञांनी आपले विचार मांडले. शिल्पा बिराजदार यांनी विद्यार्थ्यांना घडवताना 'सकारात्मक शिस्त' किती महत्त्वाची आहे, यावर उत्तम मार्गदर्शन केले, तर शिक्षकांसाठीच्या विविध स्पर्धांबाबत सीमा वरुणकर यांनी सविस्तर माहिती दिली. संकलित मूल्यमापन १ (PAT-2) ची प्रक्रिया स्पष्ट करताना सोनाली मोरे यांनी विविध उदाहरणांचा वापर करून शिक्षकांच्या शंकांचे निरसन केले. विशेष म्हणजे, संदीप कदम यांनी काव्यात्मक शैलीचा वापर करत 'निपुण महाराष्ट्र' जिल्हा आणि राज्य अहवाल सादर केला, ज्यामुळे परिषदेत एक वेगळीच उत्साहवर्धकता निर्माण झाली.
नडगीवे नं. २ शाळेच्या शाळा व्यवस्थापन समितीचे अध्यक्ष, सर्व सदस्य आणि शिक्षक वृंद यांनी या परिषदेसाठी विशेष परिश्रम घेतले होते. त्यांच्या अत्यंत मोलाच्या सहकार्यामुळे आणि शिस्तबद्ध नियोजनामुळे ही शिक्षण परिषद यशस्वीरित्या पार पडली, त्याबद्दल केंद्रप्रमुख गोपाळ जाधव यांनी सर्वांचे आभार मानले. या परिषदेच्या सांगता प्रसंगी, पुढील संयुक्त शिक्षण परिषद 'कुरंगवणे खैराट' शाळेमध्ये आयोजित करण्याचे सर्वानुमते ठरविण्यात आले.
